29.02.2008

今日係4年一次既2月29日呀..

下星期就出發去巴黎field study, 但每人派完車飛之後就無哂下文.. 連下星期一既堂都取消埋.. 咁到底我地訓邊? 有咩行程? 牛記笠記得嘛? 迷之課程!!

其實都第3年辦呢個課程, 可唔可以做得有系統D, 話哂都係讀管理, 你可以管理得好D嗎?

英文..

唉.. 大大話話都學左十幾廿年, 但都係學唔好.. "書到用時方恨少".. 好句!!

每當要寫project既時候, 就會知道自己既英文係幾唔掂.. 而家聽講睇都無問題, 但一到寫就企左係度.. 最慘係分組時, 就更覺得慚愧.. 真係唔好意思拎份功課出來, 其實英文對同學們都係foreign language, 點解其他國家既人就可以咁好..

p.s. 今日小心情: 一氣收到2個包裹, 都係以前town hall既同事寄, 好開心!! 2位都好有心, 多謝哂 Joyce姐同Gary哥!!

最近..

如題.. 好多project要寫, 好多功課要做, 又要搵intern同寫CV等等..

放左學回家就完全唔想用大腦.. 只係想睇D野輕鬆下.. (星期六日勁做功課個隻)
最近比我發現左online睇"皆大歡笑"古裝版, 所以晚飯時間佢已經係我既最佳良伴.. 真係好抵死!!

預告: 嘔完1份project同2份case studies之後, 下星期有4日既巴黎field study, 希望無手尾跟.. (有不祥既預感..)

麥記..

我地今日開始上為期2日既Sports management, 但MISS用左3個鐘去講歐洲及法國既歷史, 完全同Sports拉唔上任何關係.. 所以到差唔多完堂時, 法國仔終於出聲, 反應左我地大部份既心聲.. MISS完全係窒左..

所以下就MISS只好出最後一招, 分組做project.. 唉.. 我地要present北京奧運, 指示又超唔清晰, 大家做到一舊雲.. 因為MISS由頭到尾都講過D咩technic, 我地就只好估估下去做.. 仲要係聽朝就要present..

如是者, 做到9點半已經餓到半死.. 完全唔想煮, 所以豪左比麥記.. (因為北京妹要上網, 而我又想食好耐..), 今晚食左個最平既cheeseburger+milk shake, 算抵! 用左1.9歐埋單.. 我見排前面個阿太用9.35歐埋單(1人份), 替佢肉赤..

但總算圓左想食麥記既心願.. hee

元宵佳節

由北京妹口中得知, 原來聽日(即香港既今日)就係元宵, 元宵節快樂!! (算節日嗎!!??)

今晚去左BAR度睇曼聯對Lyon, 雖然最後和波, 但算係第一次係L.R.睇波.. 不過大部份都係捧Lyon喇..

回家時, 見到個好圓好光既月亮, 有無大D就唔多覺, 但真係好光.. 可能呢度D屋都得幾層, 所以可以望得好清楚..

月圓之夜..

Internship

話說之前IN左個美國酒店既internship, 得7個人成功(35人面試), 我地班有2個, 我好似係其中一個 (因為得我無收到落選通知..) 但重點係, 佢亦無通知我係得左.. 好迷!! 又好似因為太少人成功, 所以學校將成個project推左.. 又係迷..

anyway, 會搵人問下..

另外, 我地原來可以搵其他國家, 如東歐或其他, 去馬爾他都好喎.. 都係留係歐洲版塊會開心D.. 之不過今日聽個介紹會, 我地要搵既係assist of manager既job, 要包埋marketing, cost control等等.. 咁如果只係想單純地搞活動, 好似有D難..

p.s. 傍晚放學回家時, 管理員叔叔送左2個大croissant比我, Lucky!

大發現!!

今日放學之後, 去左大超市度補倉..

今次自己一人去, 行得好FREE, 好耐無試過.. 因為平時韓國妹同北京妹都會約埋一齊去, 其實我覺得幾煩, 要等來等去.. 仲要好似保母咁, 佢地買咩都會問你意見.. leave me alone..

所以今日比我發現我細個好鍾意睇既一齣卡通片, 竟然有法文DVD, 仲大特價, 真係有一刻想買左佢..
齣卡通片既主角係宙斯個孫女, 叫咩名都唔記得喇.. 但個一剎真係好感動.. 係vol. 1既1-4集.. 有細路仔愛神, 有靚仔老豆阿波羅同隻鴨.. 好Q..

15.02.2008

話說學校擒日朝失火.. 好彩我已經放左學回家, 平安大吉.. 到夜晚同學同我講話貼左告示, 星期一先再上堂..

大安指意地訓到朝早9點半, 比電話嘈醒, 原來係個CO-OR打來話我仲咩唔返學, 同埋好通知其他人都唔返.. 無病呀.. 關鬼我事, 咩都係我錯..

果然人善比人欺.. 要做惡女!!??

由於失火, MISS左既堂, 由呢2日補反.. 好甘.. 下就由1300-2000, 聽日由0830-1600.. 想死呢!!

課堂休息之間, 拎左法國仔同學部iphone玩, 係法國用iphone上網不另收費, 好好玩.. 佢真係好有錢, 用iphone著VW.. 豪!

情人節快樂!!

嫁得喇..

黎到法國之後, 已經練就18般武藝.. 今晚又改左條褲, 夠高的話, 電燈泡都換埋.. 娶得過架..

話說學校賀年活動之後, 以為終於都可以休息一下.. 點知呢個星期一先apply份internship, 星期四就話要面試.. 百無之下, 又要夾著早少少放學(因為D店關1900, 我地好多時放1815..), 如是者, 今日放左學就喇喇林去買左對鞋同條西褲, 好彩有減價, 2樣加埋都仲可以接受.. (好多法國學生都係著SUIT.. 男仔就簡單喇..)

但重點係, 其實我唔係好想IN.. 因為係美國既酒店請人.. 不過當攞經驗..

p.s. 預祝波士生日快樂! 賺多D!! 有時間就來法國吧.. heee

順利完成..

學校賀年活動總算完成..

不過, 真係明白到唔同語言係會對溝通做成問題 (就算大家都係講英文, 都會有理解不同..), 亦明白到自己既不足之處.. 雖然最後吞左隻死猫, 同做左chief.. 不過我都賺左友情同人地既讚賞, 呢D比其他人既口臉來得更滿足..

新一年祝大家更進一步, 財源滾滾! 學業進步!! 身體健康!!! 心想事成!!!!

恭喜發財!!

鼠年行大運.. 心想事成..

真架!!??

"據《健力士世界紀錄大全》記載，「鴨脷洲」是世界上人口密度最高的小島，小島面積1.32平方公里，大約居住了90,000人以上，人口密度每平方公里68,200人，而我就是其中一個人。"
- by internet

年三十晚..

係今日嗎? 因為唔太肯定個時間..

點都好喇, 祝大家"身體健康! 財源滾滾! 心想事成!!"

我呢排都係咁喇, 好忙地上堂/做PROJECT/學法文&英文.. 不過, 因為個賀年活動令我更了解到我最鍾意既都係搞活動.. 無揀錯科來讀..

希望順利畢業, 學業進步!!