29-01-07

離哂譜, 成晚停電停左5 / 6次, 好彩係飯岩岩煮好, 碟薯仔炆雞就仲差少少, 勉勉強強可以食.. 搞到成餐飯都唔知點咁… 咦咦咦咦咦咦咦咦咦咦咦咦咦咦 > _ <

我今日又買左支白酒返來嘆.. hee 其實唔係喇, 只係覺得反正呢度咁平, hkd50就有一支750ml, 同買水都差唔多價錢, 咁我就train下自己既酒量之餘, 可能對以後讀旅遊都有幫助, 或者好似以前個阿sir咁, 係酒店做品酒都唔錯.. (我而家開酒好叻喇.. )

另外, 今日收到樂天既email, 知道佢已經出發左, 我都唔知應唔應該替佢高興.. 比如話好似莎拉咁, 你講到外地好好, 可以好似海?咁自由地生活, 其實當你唔係香港之後, 你會發覺香港其實真係一個好好既地方.. 其實我地都有好多不如意既事, 亦都會有灰心同沮喪既時候, 我都真係有諗過要買機票返香港就算喇.. 我地 (其實係我喇..) 都係有苦自己知.. 可能好多人都覺得我係呢度可以自由自在, 唔洗做, 唔洗睇人面色.. 其實我係呢度, 每日都要計過算過, 根本好多野我係香港個時係唔會計較, 因為我知道我可以賺返返來, 但而家d錢係用一日少一日, 反而好懷念自己賺錢自己洗既日子。同埋我每日返學一樣要睇老師同同學面色, 佢地一樣會對你有要求, 當你達唔到佢地既要求個時, 同你老細比面色你睇係一樣, 仲要衰d係 ─ 佢唔係出你份糧.. 所以係外地都唔係大哂或嘆哂..

不過, 每人都有一個心願或一個夢吧.. 可能我都係一個幸運既人, 最少我仲可以係個夢入面行緊, 即使佢係苦樂參半, 條路都係我自己揀..

樂天: Bonne Chance!! (Good Luck!!)

28-01-07

其實我明白點解自己咁想返香港, 因為係呢度無啖好食, 你諗下係香港有幾多好野食, 而且仲要係好平就食到.. 但係呢度就每日都要去睇下有咩係平, 基本上係有咩無咁貴.. 連一筒pringles薯片都要2.13euro, 係香港的話好似hkd9.9就可以買到 (仲要無我最鍾意既芝士味.. ) 好想食街邊既咖哩魚蛋, 雞蛋仔, 煎釀三寶等等.. 仲有媽媽煮既食送, 不過而家點都要等到年底喇.. 因為要打工賺d旅費先..

p.s. 呢幾日乾燥到不得了, 每次開門去廁所或開水龍頭都被電到死死下, 真係痛死死..

27-01-07

好過份呀.. 我地呢度星期六同日竟然係無人做清潔, 即係話無人會洗廁所同沖涼房.. 一層有咁多間房, 有咁多學生, 會有咁多人共用, 竟然佢地可以唔理, 就咁自己放假.. 個廁所而家真係好嚇人, 聽日仲唔知點算.. 對上個聖誕節佢地都好似放左2個星期, 個廁所就咁2個星期無人洗, 聽聞超得人驚.. 我個次旅行避開左, 但3月我地又放假, 我今次無得走呢.. 希望佢地唔會放喇.. (因為我地係放semester break..)

另外, 大家有無咩方法防上掉頭髮?? 因為好多人都話法國既水, 飲得多會掉頭髮, 就連法國人自己都係買支裝水返屋企, 佢地都唔會就咁飲水喉水, 雖然我已經特登買水煲煲過d水先飲, 但都真係好似頭髮又少左d咁.. 我而家都只好好似佢地咁特登買水飲.. 好彩d水都唔會好貴, 但長此下去都唔係辦法.. 周醫生有無辦法呀…

26-01-07

搬入黎未夠一個月已經停電4次, 今晚係第4次喇, 仲要次次都係我地呢座, 離譜..

原本好想3月份返香港架, 因為有2個星期既假, 不過d機票真係太貴喇!! 咁就算喇… 唉.. 我真係有晚發夢我返左香港, 仲係街度撞到美玲 (因為我成日都會係街度撞到佢.. hee), 之後佢仲話岩岩去完超市, 比左d方包同芝士我, 真係好好笑..

可能最近上堂壓力比較大, 所以先會想逃返香港.. 但我點都會捱落去…

25-01-07

落雪喇!! 落雪喇!! 落雪喇!! 落雪喇!! 落雪喇!! 落雪喇!!

終於都第一次感受到d雪落係身上既感覺, 好感動呀!! 好似將平時係新聞度話加拿大或美國好大雪咁, 突然就zoom埋你身邊, 個感覺好得意..




我拍左短片, 想睇就報名.. 嘻嘻..

p.s. 今日去申請房補, 個申請編號竟然係cc6668, hee.. lucky!!

24-01-07

果然開始有運行, 話說有另一個中國仔搬左正正係我樓上, 佢人都未踏入房, 已經走去申請左裝上網, 而我又偏偏拖拖拉拉咁一直都未辨, 正好佢今日搵人一齊夾.. 哈哈, 咁我就可以慳反安裝費同六月之後既費用喇.. (因為佢係要簽9個月既約.. ) good fit 呀..

而家上堂雖然暫時跟得上, 但好唔想上其中一個miss既堂 (同我上phonetique個miss; 同上一期一樣, 唔太鍾意個個就上足3日.. ), 上親佢d堂, 個人都會好支力, 由其係個腦 (可能太耐無用, 唔慣.. :P), 都唔明點解又係對我嚴d, 其他人既對答錯左都好, 佢都會同佢講: “pas probleme, c’est pas grave!” (無問題, 唔洗介意), 但就好少用係我身上囉.. 仲要係100個中國人, 100個都會鍾意佢, 哼!! 偏偏我對佢就無咩好感, 或者我地兩個都一樣, 反正佢都唔係好鍾意我!!

21-01-07

好老土架d人, 都唔明點解係都要係廚房度傾計, 仲要係一群死佬係度煲煙, 想入去煮野食都唔得.. 煩!!

而家既上堂情緒已經好d喇.. 因為我發覺我係應該讀inter. 2, 因為我都明老師佢地講咩, 我其實係無入錯班, 只係其他人應該去讀高班, 而唔係我去讀低班.. 已經有好幾個人比老師話要佢地去高班, 所以根本應該係佢地走.. 拉高哂d程度, 不過有佢地就可以識多d唔同既字或句子, 都幾好既..

不過, 連美國仔都有同感, 就係大家都唔鍾意個一幫美國學生, 我地都好懷念之前個班可以嘻嘻哈哈地上堂.. 而家呢班同學總係有一種疏離感.. 可能之前個班太開心喇, 令人唔想分開..

p.s. 聽聞聽日會落雪, 希望係真既喇.. 好期待呀..

20-01-07

話說擒日跟學校去左bordeaux, 但9個鐘既行程, 用左差唔多6個鐘既時間係坐車來回程, 所以其實對波爾多真係睇得好表面, 都好似無去過咁.. o徒哂, 不過咁都好既, 起碼仲有要去多次既理由.. hee

另外, 今日終於都的起心肝, 再執過張?上面好亂既物品.. 睇反舊同事比我既聖誕卡, 先醒起原來自己一直遺忘左要多謝佢地, 尤其我阿姐(上司喇!!), 佢仲記得我鍾意eason, 特登托人買隻碟比我做聖誕禮物, 真係好多謝好多謝!!! 我可以幸運地跟到一個咁好既上司, 真好!! 掛住你地.. (麻煩睇到呢段既同事, 將呢段print反比catherine睇.. hee)

p.s. 今日去買野回來個時, 竟然見到班越南人係度折花, 可憐既梅花呀.. 仲要而家開始係度播佢地越南話既話劇, 好似打齋聲咁.. 討厭!! (真係想播 “北漏洞泥” 個段鈴聲比佢地聽..)

19-01-07

今日係要上phonetique班既名單上見到自己個名已經被老師寫定落去, 唔知點解個一刻反而有d高興.. 可能因為老師仲對我有希望, 覺得仲有對我花時間既價值, 反正我地班個中國佬佢就無份, 佢d法文比我講得仲差, 老師都無點名要佢上.. hee, 咁樣諗好似好衰, 但個刻我真係笑左出黎.. 加油!!

p.s. 係我地宿舍個圍欄邊, 開左棵梅花呀.. 我都係第一次見實物, 都真係幾靚架…

18-01-07

好大打擊呀.. 今日去左bank度問我仲有幾多存款 (因為網上既密碼之前入錯左5次, 所以被band左.. 唉!!), 結果剩反好少錢咋… 點算呀??!! 咁我無錢繼續讀??

另外, 點解你地都無人寄信或寄野比我既?? 之前咪有人話會寄d零食, “口粒濕”比我, d野呢?? 我每日行過自己個郵箱, 都只係見到d廣告單張, 好鬱卒呢.. 你地寄海外都係hkd3.3? (我呢度最平寄張postcard都要0.85euro呀), 你地咩都寄d黎呀, 好悶呀!!

17-01-07

eeeee 係我好努力地背緊dialoge既時候 (因為第二日有role play), 竟然係窗邊傳來eason既 “歲月如歌” (反正係 “兄妹”既廣東版), 好親切呀!!! 個個人都幾識貨.. 唔知係咪個香港仔, 唔係應該唔會聽廣東歌架…

話說回頭, 自從我旅行回來, 我都係同中國仔搭“火食”, 所以我又要煮!! 不過都通常係佢煮佢洗, 我可以只係久不久煮一樣我鍾意食既.. 就好似早兩日就煮左 “薯仔炆雞翼”, 好味道!! 不過, 法國d薯仔唔得似香港咁粉, 所以都係差dd.. 今日就煮左好拿手既 “煎豬扒”, 好味呀.. hee.. 可能係太鬱卒, 所以要用食好d來(乙水)自己…

15-01-07

今日上堂係呢一個miss教, 佢個人都nice, 但好唔鍾意我地班既同學.. 因為差不多有一半係美國人, 我都知佢地既程度比較高, 所以listening或reading, 佢地成日都話明8-9成, 咁佢地都有d真係可以講返出來.. 但我地班有個中國佬 (除我同中國仔之外另一個中國學生, 佢樣似35, 但係話得25囉..) 佢就成日都話自己明白, 仲係無7成都有8成, 但係你一聽就知佢無料到.. 我就好真既, 我今日都真係話自己明得個一成, 偏偏個中國佬就話自己明8成, ok!! 但問佢個時, 佢係copy我講既內容, 連miss都加句 “呢d tivona已經講左”, 頂!! 咁你唔好話自己明咁多喇.. 其實美國個班都唔好得去邊, 都係好自傲咁, 同之前個班同學差好遠.. 好唔鍾意..

14-01-07

每個月做月結, 就覺得自己d錢洗得好快咁.. 雖然房租比哂半年可以放心d, 但係黎緊要裝上網就要額外比錢, 月月比錢之餘, 仲要比安裝費, 又打算買個雪櫃(就算二手都好, 都要錢!!), 好窮呀!! 有咩錢可以賺呀?? 可以好似係香港咁有兼職做就好喇..

13-01-07

好煩呀!! 不停係咁咳, 特別係夜晚先至咳得再厲害d, 搞到我都無覺好訓..

講返法文班, 前日仲雄心壯志地話要學好法文, 擒日上堂又受打擊, 班度d人法文都好勁, 我好似成日都唔明佢地講咩, 但miss講咩又明喎.. 又成日都比miss捉到我既錯處, 好無自信呀.. 雖然中國仔佢地都係咁安慰我, 但真係無咁既信心呀..

11-01-07

好驚呀!! 今日上左第一堂, 我真係編左去第二班, d人既法文都好勁, 今日已經有個韓國妹要求調去低班喇.. 不過 “有人辭官歸古里, 有人漏夜趕科場”, 之前個班既委內瑞拉女生就好不滿佢入得第一班, 終於佢聽日都入第二班.. 唉!! 我仲係度鬼咁擔心自己跟唔上, 偏偏就有人死都要讀高班, 我情願好似韓國妹同英國太咁, 係負一班度讀, 佢地都不知幾高興.. 但又覺得呢個係一個好好既進步機會, 因為d老師都出名好人同一定會有大進步, 咁又無理由上一日就放棄, 咁又好似有d那個.. 努力下喇.. (雖然聽聞話因為太多人要讀第一班, 所以將d有可能有咁既能力既人升到第二班, 我就正正係呢隻..)

另外, 放學之後都趁惡夢未開始之前, 同韓國妹去睇左套韓國電影 “the host” (我唔記得左佢中文譯做咩), 都幾好睇, 同埋好多位諷刺美國人同sars個期既現象 (街上個個載口罩, 要入渡假屋等等, 都幾搞鬼), 不過最估唔到係個女都要死, 好可惜, 佢咁努力地生存下去, 但係都… 我都要學佢咁, 將自己“致諸死地而後生”吧.. 死就死喇, 學好法文佢..

10-01-07

踏入07年, 終於都動手再寫, 因為旅行回來個人仲係暈暈地, 而且又勁喉嚨痛同咳(唔該我要周醫生既藥呀…), 加上要洗衫同清潔房間(係成寸厚既灰塵, 連我都忍唔住.. ), 所以拖到今日.. Bonne Annee 2007!!

講左今日分班先, 我竟然分到去中級2班, 即係我由負2班升到第2班, 中間係隔成3班呢..天呀!! 好擔心呀.. 我一路只係擔心自己要再讀低低班, 我升班都還得神落, 而家仲要跳班添.. 但教個2個老師(又係得2個老師..) 都好似係出名好人同教得好, 希望我跟得上吧.. 努力..

聽日要上堂喇, 今晚都要早d訓, 呢幾日都慣左成11點幾先起身, 開學第一堂竟然係0830, 天呀, 咪玩喇..

Lundi (星期一): 1100 – 1300 / 1500 – 1700
Mardi (星期二): 0900 – 1100 / 1300 – 1500
Mercredi (星期三): 0900 – 1100 / 1300 – 1500
Jeudi (星期四): 0830 – 1030 / 1300 – 1500
Vendredi (星期五): 1100 – 1300 / 1500 – 1700

21-12-06

蚊今日已經到london喇, 而annie仔聽日亦都飛喇, 星期六我地就可以見面, 好期待呀..

好耐無講既廣東話終於都可以再出場, 呢3個月我除左法文指定要學之外, 仲要學英文, 學普通話, 學到d語言都jam哂線.. 我諗講反廣東話我會有自信d, 希望唔會太out喇..

聽晚我都出發去巴黎喇, 希望一切順利..

20-12-06

今日係最後一日上堂喇, 所以下晏我地班都搞左個小小既farewell party, 好唔捨得, 雖然我地來自不同的國家, 但大家都好友善, 又會互相幫助, 之後大家或者會分入唔同既班, 所以大家都好依依不捨, 尤其美國既學生, 因為佢地大部份都唔會再繼續..

咁就3個月, 好似咩都無做過咁就過左喇.. 希望明年既學習會更好吧!!

返到宿舍之後, 又係另一場既飯局, 今日飲左好多酒, 係學校既party飲, 晚飯飯局又飲, 飲到臉好紅, 好想訓呀… 又不停咁食, 唔怪得個個中國女學生都話要減肥喇.. 我都要控制下, 難得之前瘦左嘛, 點都要keep 住.. hee

另外, 今日係學校同英國仔傾左幾句, 原來佢都係住呢邊宿舍, 我仲一直以為佢係住係學校個邊, 佢仲要住正係原本比我個間房既隔離, 好邪呀!! 哈哈…

岩岩停電, 嚇死死, 不過佢地話久唔久都會, 唉…

p.s. 特別要提既係, 多謝莎拉係零晨3點幾打電話鼓勵我, 我會努力, 你地都要加油, 要照顧身體 呵..